قصيدة للزجال المصطفى عبسي بعنوان: “آ ولدي”
بوك كان عايش ب مزية
ما يعاشر اللي ينافقو
ؤ طريق الخير كانت طريقو
كان صادق ؤ داير النية
ما كان يسمح ف حقو
ؤ الواجب كان على عاتقو
خذ منه و لو غير شوية
ف حياتك تقدر تطبقو
ؤ الحق ديما كون صديقو
¤¤¤
ربي عالم يا ولدي
راني بزاف كا نبغيك
انت قطعة من كبدي
من حقي نخاف عليك
ندير معك كل جهدي
نربي ؤ نزيد نوصيك
ف الاول غا اسمع لي
ؤ دير اللي تليق لك
¤¤¤
اصلح ف الاول ذاتك
تفلح ؤ يصلحو لك الناس
دير الخير ف حياتك
ب جهد الله تكون لاباس
قوم ب كل بواجباتك
حقوقك ما تقبل مساس
احترم يا ولدي ميقاتك
ؤ اخدم بلادك ب إخلاص
التربية هي مفتاح نجاتك
ؤ ف الوفاء لها كل الخلاص
اقضي باللي كاين حاجاتك
ؤ لا تكثر كلمة ناقص ؤ خاص
خلي الحسنى تطبع معاملاتك
ؤ ارع وليداتك بلا قياس
لا تجعل اللوم من عاداتك
راه يهدم المحبة ؤ الإحساس
الفضايل الحميدة تنور حياتك
بها يتبنى ب الصح كل ساس
¤¤¤
نوصيك وصية
ؤ كل وصية
ما تضر و لا تقتل
سير ب النية
راه النية
للغايات ك توصل
دير الصبر بلية
هاذ البلية
كلشي بها يتحل
الوطن هو عطية
هاذ العطية
من الله ما كا تكمل
حبه من القلب مزية
هاذ المزية
تبغي التضحية ؤ العمل
المغرب بلاد محمية
ب قدرة ربانية
ؤ ناسها ما يقبلو ذل
اجعل افعالك راقية
ب الرزانة مقضية
تكون ساروت لكل قفل
القناعة ما هي خطية
هي أرزاق مهدية
ما يبلغها ميسر الحال
تخلي الخاطر صافية
من النكد معفية
ؤ تبقى مرتاح البال
لا تكثر سخرية
ف الكلمة قوة مخفية
ب العبار تكون الأقوال
تحلى ب العصامية
تخلى على العدمية
مهما طال الزمن لازم تنال
عاشر الناس الوفية
عشرتهم ذخيرة حية
أسرارهم ما تقبل تحوال
