عبد اللطيف بنيحيى
يَا هَادْ الْحُكُومَة
دْرَّقِي خَنْشُوشْتْكْ علِينَا
عيِينَا وْمْلِّينَا
مَا بْقَاتْ مْعَكْ عِيشَة تْحلَى
ايَّامْنَا مْعَكْ سُودَا كْحلَى
هْرفُتْ يَالْمْجْذُوبْ علَى خِيرِي وْخِيركْ..
سْكَاتْكْ وْسْكَاتِي سْبَابْ شْقَانَا
طَالْ شْخِيرِي يَالْمْجْذُوبْ وْشْخِيركْ
مَا يْدُومْ حَالْ علَى هَادْ الْحَالْ
كْسِيبَة فْزْرِيبَة وْالْحَاضِيهَا ذِيبْ
مْسَعّْفِينْ هْبَالْكْ يَا هَادْ الْحُكُومَة
وْالْخِير مْعَكْ اللهْ يْجِيبْ..
حُكُومْةْ قْلْبْ شَقْلْبْ..
لْبْلَادْ بَقْرَة
وْهِيَ يَالْمْجْذُوبْ
فْالْبْزُّولَة كَتْحلْبْ..
حُكُومْةْ جَقْلَالَة
الْمْزْلُوط بْحَقُّو عيَا يْطلْبْ..
وْجْوَابْهَا دِيمَا يَالْمْجْذُوبْ لَا لَا..
لْعبَادْ حَالْتْهُومْ حَالَة
وْالْحُكُومَة نَاشْطَة رَشْقَالَة..
(عبد اللطيف بنيحيى)
