فَاخْرَكْ اهْبَى وا صحيبي صحيبي
كنت حاسبك جبل
ما يهزك ريح
لقيتك غير نوالة
فرطت في الحَب
وتوضات بالشيح بالنخالة…
س…س….س
السكات كنسمع الغوات
ريحة الموت زهر الموت
الكلب كينبح
وتابعو مولاه
مولاه كلب وما سايق خبار
الﯖلب يا مﮝواه
من حر الحﮝرة
هاز همو طالع دمو
تجرج ﮝدمو
بالليل وبالنهار..
س… س…..س…س
السكات كنسمع
بين لفيدق وسبتة
طاحو شلا دمعات
المحبة ..الهوية عا بروباﯖاندا
والعيشة فيك يا بلادي مشات
ياك مات عشيري في القلب مات
تدفن في موج لبحر عزري
الحبيبة عليه زغرتات
شفت في المرايا اللي جاي
واللي فات التنهيدة والحسرة
من لكبادي فدفدات
شفت في المرايا
الوجه يتألم
والعقل يتعلم
وأنت يا تريكت الهم
تبزق وتعلم
شفت ورايا شفت قدامي
الصهد الحامي
شحال من حروف عرايا
والحاضي ناضي
موجد فلايك الموت
لﯕاع لخوت
لله دير خاير في راسك
خوذ قلم وزمم
عرف كيفاش وعلاش تخمم
راه مزين العقل
يكون مزوج بالقرايا
راك قبيح ريحتك عطات
ما انتاش مليح
خدام عبد نخاف عليك
في المرجة تطيح
راه راه والغوت وراه
راه هذاك اللي كلا خبزك وماء
حاز أرضك وسماك
حتى من صندوق لبلاد خواه
راه راه
واليوم شحال ديال لكفوف
بالتصفاﯕ تبعاه….
مابغيت والو
ما خصني والو
بغيت نرجع لذاتي
نسكن فيا ونرد الباس لماليه
ونلوح السوارت
بغيت نرجع لهنايا
نجلس حدايا
بعدما لخليل في الحزة
مشى للشمال مونتو لهبال
وخوا بيا
يمكن أنا السباب
يمكن لعنة في زبيبة المكتاب
يمكن الدنيا من أولها معطوبة
ياك كلنا كلينا التفاحة
مسوسة مضروبة
اللي تقول ها المعقول
تلقاها في عرس الذياب
مطلوبة
يمكن الوقت لبست قفطان
لغدر
يمكن الريح كم زمان
بالزفزافي والعذاب
بالمحنة والقهر
سدات علينا الباب
محمد كابي
الجديدة في : 1 غشت 2026
