الزجال : إدريس بلعطار
بخها دخان
وانت حزين
ولا غنيها
في ساعة الرشوق
تنهيدة مجروحة
توصل في الحين…
بلا براح بلا بوق
ولا كتبها ياذآآاك
درنا الكتبة مواتياك
درناها مبايعاك
درناها كاتباك
على مول المكتوب
العاشق…
اللي مابدل معشوق
وقبل
ما تكتب على غدّا
اكتب بعدا
على الشمع
اللي تڭدا
وڭدا معاه
حروف الصبر
وطرف م لعمر
وربيع البارح
وربيع اليوما محروق
وقبل
ماتكتب على غدا
شوف
خيط لحكاية
منين بدا
وسرّد الورقة مزيان
مزيان سرد الورقة
خلي على اللي نزلها
من السما سرقة
واكتب
على ڭلب
شاعلة فيه خلوق
