قصيدة زجلية للأستاذة سناء يماني بعنوان:”أولاد الجديدة”

نكتب ليوم قصيدة
شكر وتقدير لمجادل حرير
ولاد الجديدة
ولاد الناس ولاد لخير
ما شافتهم عيني
ما شاركت معاهم طعام
ما تبادلت معاهم كلام
وخا هوما ولاد بلادي
وهذشي ماهو بيدي
هذي حكاية و رواية
حكم فيها لقدر
متايبة ليك ياسيدي ياربي
حتى وصلت لسن الربعين
صبحت نكتب كلامي
من بعد لمنفى
هنا بانو ولاد بلادي
ما عرفتهم ما عرفوني ونا شابة و درية
سولوني فين كنتي علينا مخبيا
وزيانت حروفي
نكتب لقصايد وتبان
عرفتها حبي ودوايا
نكتب بلا هوايا
صبحت بنفسي نفتاخر
أرملة وعلى ذراعي عوالة
ما نقبل الضصارة
ماني سلعة في الدلالة
ماعندي مع لحزارة
آييه يا ليام لغذارة
بنت لقاع والباع
والشمعة من ذراع
يا ليام المكارة راكي نكارة
نحكيها ليكم بحال لخرافة
في وقت من لوقات
تزيرات عليا ليام ولعوام
وعضني الزمان
وهذا علاش وليت نقول
لي عضو لحنش من لحبل يخاف
إوا نكملو لحكاية
خطاتني المونة
وبرد لكانون
ونا ما نرضى بشي حد ولا بالعار
وتقادة الجهد
والعكاز لي كنت عوالة عليه
تهرس و تهد
ما بقيت عارفة نقاومها
وما عرفتها من الله ولا من لعبد
الدمعة تسري دم ليل ونهار
نحمد الله على خير ورضاة لولدين
غطاتني بثوب حرير
وحييت من جديد
ياك كنت في كرسي
مكبلة مهرسة مشلولة
وخرجت للدنيا
تعرفت بحلاوة اللسان
وكلامي بحال الشهدة
عسل بطيب لمسك
إوا هنا بانو ولاد بلادي
حطوني تاج فوق الراس
قالو هذا إبداع
يبقى ذكرى
ما يبلى ولا يتنسى
ما هو نعالة تحت لقدام ينداس
شجعوني خلاوني نكتب ونزيد نكتب
نعبر ونعلي لمقام
صبحت قصايدي
وريدة في جنان
وهويبدع إبداع لفنان
سي العيبوسي ياسلام
وأول خطوة ليا في هاذ لمقام
من بعد الله
سي عبد الله لحنبلي
بحال نقطة لعسل في قلبي
نهديه تحية وسلام واحترام
ينشر قصايدي مدة هذي
خلاني نجمة في سمايا
في جديدتي معروفة
وبصورتي زادني شهرة
وأنا بحال المهرة
من بعد ما كنت في جنب لحيط
من خيالي حشمانة
نشكر أنا ولاد الجديدة
وهي مدينتي لحبيبة
بقلم: سناء يماني