********
شوفات… ف …ضو … لغروب
الشوفة الأولى
خلّاتني…
نْحلّ عيني و نْشوف
نْتخايل ذاك الظل المايل
نْعاتب العين على قلة النظر
نْعطيها جغمة … صبر
نْسقيها حلْمة خفيفة
تروي خاطري الناشفة
و تْوَرّيني ف شقاوة نْعاسي
ضوْ يْجلي ظلامي ساعة لكبر
الشوفة الثانية
….نْفرك عيني
تْزْهق الحَلْمة
تْتوضر بين خْطوات لفجر
يطلع النهار رايم
واقف على كرون لعمر
مرّة يرجعني لّ صُغري
مرّة معايا يكبر
يبدل حلاوتي بالمٌرْ
يْهيَّج رمادي … هْياجْ وْعر
الشوفة الثالثة
… نْغْمض عيني
و نْفيق …
قبل ما الزمان يعيق
يوقف ليا على باب الزهر
يجيني ف صيفة القدر
يْهَز سعدي معاه
يجي ف صيفة الغدر
يْنسف وعدي حداه
و إلا يجي عكس بلا خاطر
غير خلّيني…
نشوف شوفة الكرش
نْتهجّى حروفي
نْعْصَر الفهامة
و نْوشوش لسري ف عماق جوفي
نواعدني بوعد حْلوفي
إلا طاوعني هاد الكاشوش
نْسرّب كْلامي من عقال اللغا
نْصْغى… نْستْلغى… نْستوعى
و نشوف…
الشوفة الأخْرَة
من عين الشمش
الغارقة ف عين لبحر
نشوفها شوفات ف عالم اخر .
… حسن تميم
