مهماز السكات
شحال واسيتْ خاطري
ترﯕبي في احلامي
تكوني مْضمَّة في احلامي
تهمسي في اوذاني
تفكي سر العطفة
اللي شاطناني
محيراني
بالياني
واش أنا زربت
وزلﯖتْ بيا ﯕدامي
شربت كاس ما هو كاسي
اللي كان كاسي بالمعاندة
حرف من الولف عراني
شفت في عيونك
نظرة ليها شلا معاني
حبست في الجوف كلامي
واش نزعم والشك ما هناني
تقدر الشوفة منك
تكون عا شوفة مخطوفة
بين خيالي وسلامي
تقدر تكون جلالة عمياني
ما خلات الشمس
تشرق على رسامي
مرة نقول هي ماشي ليا
يا ويحي لرحبة فليو أش داني
حتى نتيق بهزة غرامي
مرة نقول واقيلة
كذبة مغسولة بالكتبة
مرة نقول سكاتها حقاني
انا براني ساكن هيامي
هي دواتْ هي مانوات
وانا مادويت الصبر عياني
تشرشمت لحروف
وتكسرات اقلامي
يمكن صور لحبق عالي
يامﯖواني
وقلبها مكتف بسلاسل الغير
وأنا تنغير حتى
من خيالي إلى نساني
ملي كتجيني في الليل
في صورة طوير رباني
نقول يا فرحي
تهنيت من تخمامي
ملي تغيب بنهار
نعوم في الفﮕد
تشعل نيراني
نعض من الشوق اكمامي
دخلت عليك بنار الحرف
شكون أنا في ﯕاشوش لبغو
واش أنتِ ولا أنا الجاني
دخلت عليك بمداد لحبة
بلا سبة
لا تخليني لومة
في شفايف عدياني
غير خلي السكات ينطق
تبردي هاذ الصهد الحامي
محمد كابي
الجديدة في : 4/12/2025
