حكاية نجمة وهلال
ݣال يا لعمالة
آه منك جبارة
سلطانية
بعيونك سحارة
كلامك ثمر حلو
وأمرك حيرني
حتى لدابا ما فهمتو
كيف تصبح جوارحي
شاعلة جمرة
تطفيني مرة يا لمرا
قتالة انت فعايلك بدالة
موجة كل نهار ف حالة
سولت عليك ولد لعم ناس لحومة
وولد لخالة
لݣلب بغاك
يا بنت دكالة
راك محنتيني ݣبالة
الشهدة فهواك
مذاقها علقم دار فيا حالة
نترجى شي نهار نلقاك
ما عرفت مكانك
ف لبر ولا ف سماك
الساكن فيك حالو قاهر
وأنا ف غرامك
بغيت نغامر
سرك مدفون ماعرفتو من لعبد
ولا قدر الله عليك محتوم
يا ساتر لعيوب
واش ݣليبك يظل محروم
ارمي سلاحك
ف التكبيلة بانت جراحك
يا هاد لمرا جيني ولا نجيك
غامري
آمري
وذوقي نار عذابي
لجفا انت مولاتو
تبيعي ف رمشة لعين
لعزيز لغالي
تگولي غير بلعاني
هذا ما وتاني
نتي أمرك شيطاني
گلتي طال صبري
وليوم تقادا جهدي
خليني ليا مني
أنا هكذا عاجبني حالي
نزيد نرغب من ثاني
يهديك الله يا نور عياني
ف لحرام ما تكوني ديالي
راس السوق حلال
ثمنو غالي
نعرسو سبع أيام
وسبع ليالي
آآش گال غزالي
حمامة لبريحة
سناء يماني
