حنا كلنا على كف الريح…
ست سلامات…
و السابع… بلاش.
سلام… بلا كلام
كف ممدود ب ربع صباع
و الخامس مدسوس
و كف ممدود بلا دراع
سلامو مسوس
وكف مخبي ف شون… السلام
گالو… مگطوع
و كفوف اخرى…
تصفق ب سبع صباع
تلحس شياطة مرقة
وصبع يحسب
هذي قرفية و هذي زرقة
اش گالو ما گالو
موسم تبياع لعجل… وقَّفْ خزاينه
ها لي لاطو صهدو … هالي يساينه
شوفو همَّاز الرباعة… شكون يعاينه
صبع يقلز… تحت الضرَّاعة
و صبع مخشي ف عينه
و اتوما غا تساينوا…
دابا يطوال و يعجبكم
و غااااا تساينوا…
حسن تميم
22/06/2026
