بقلم : نادية مصوابي
ايييه الأيام
ثقالت الكلمة في اللسان
والحق ما بقا ليه مُالي
شي واكل حقُ
والشبعة عندو ما لها حدود
يقطع الرحم وعلى اهلو يتقوا
جيوبو عامرة تدفق بِرزق ليتامى
وهو للطمع صبح معبود
هم دنيا عما لو البصيرة
ما بقا يفرق بين الحق والباطل
وشي في همو يلالي
لا خدمة لا باش يدخل عشات الدراري
جيوب مثقوبة تصفر بالزلطة
الكاوية قلوب المغلوب
الصحة ذابلة والوجه شاحب
يتصبب عرق المِحنة
وشكون لحالك يجيب لخبار
اييييه الايام
شكون داها فيك الجيعان
واش مغطي ولا عريان
ونت همك يرشي
وطرف الخبز
زاد علا وطلع في الثمن
الكرش تغني
وجوعها يعلم به غير الخالق المنان
اش هذ الزمان
لي ولات الدمعة
صخرة تكسر ظهر المسكين
يدور بين كفوف الظلام تايه
وهمومو شلال يفيض بشلا كلام
ايييه الأيام
زيانيتي وتبدلتي
وعلى الدرويش قسيتي
المرا تغزل في همها
تبكي وتنوح
تطيح هنا وتعاود تنوض
تعجن خبيزة…تبيع خبيزة
غير دريهمات تسد بيبان الجوع
وهي غير ضلع مكسور
ربي مولانا العالي والعالم
شحال من فم خاصها توكل
والزمان عليها دور السمطة
وخلاها كيف الحيط المردوم
تبني ساسها طوبى طوبى
هي والزمان يا غالب يا مغلوب
بقلم نادية مصوابي
