متابعة ابو أيوب
على غير العادة كما دابت في مقالاتي المنشورة في موقعي الجديدة نيوز و رفيقتها الجديدة توداي ، اليوم اثرت المتابعة و النشر بمزيج من العربية مثبلة بالدارجة المغربية لتسليط مزيد من الأضواء على فضيحة القرن ، فضيحة تداخلت فيها خيوط و تشابكت فيها ملفات تدخلت فيها أطراف خارجية من قبيل المكتب الأمريكي لمحاربة المخذرات و تبييض الأموال و تمويل الإرهاب ” دي.اي .آي” الذي يوازي صيت و عمل وكالة الاستخبارات الأمريكية ” سي.اي.اي” مع وجود الفارق من حيث المهام الموكولة لكليهما
* قبل أيام تقدمات سيدة من تلقاء نفسها و مشات للدار البيضاء عند الفرقة الوطنية للشرطة القضائية قالت ليهم بأنها تملك معلومات مهمة ، حصرية و غير معروفة عن واحد السيد يالله قرقبتوا عليه مؤخرا ، قالوا ليها شكون هذا ، قالت ليهم عبد النبي البعيوي رجل الأعمال و رئيس جهة الشرق و البرلماني عن حزب الأصالة و المعاصرة ، سولوها شكون نتي قالت ليهم أنا مراتو السابقة و عندي معاه ثلاثة د لوليدات.
كمية المعلومات لي حطاتها لعناصر الفرقة الوطنية فوق الطبلة أصابت الجميع بالذهول، كنز ثمين طاحت عليه بي.ان.بي.جي. من حيث لم تحتسب ، كنز وفر عليها الكثير من الجهد و الوقت و البحث و التحقيق و التدقيق …لكن شنو السبب اللي خلا هاذ السيدة تمشي برجليها لعند البوليس باش تزيد تغرق الشقف لراجلها السابق و بات وليداتها الثلاث؟
قبل سنوات تعرف عبد النبي البعيوي على هاذ الحسناء الممشوقة القوام ، و دار المستحيل باش يتزوج بيها خصوصا انها كانت تنتمي لوسط بورجوازي و من عائلة غنية و كانت عايشة فعاصمة الأنوار باريس في فرنسا ..وافقات تتزوج بيه و قررات تنتقل للعيش بين وجدة و كازا و باريس ، و ولدات معاه ثلاث اطفال ، زواج اللي كان صفقة رابحة للطرفين و الكل رابح رابح ، هو خذا الزين و لاطاي و الطرف و هي خذات اللعاقة و المكانة الاجتماعية و الوضعية الاعتبارية…
لكن كيفما كيقولوا خوتنا المصريين ذيل الكلب عمرو ما يتعدل ، البعيوي طلعاتلو لمرا فراسو و قرر بعد سنوات يبدل العتبة و لفراش ، لكن عندو موشكيل هنا ديال لوليدات ، ثلاثة ديال الاطفال زوينين ما شاء الله متعلق بيهم و كيحماق عليهم ، و الى طلقها غادا تديهم ليه بالحضانة و تقدر تخوي المغريب و ترجع تعيش معاهم فباريس و ما يعاودش يشوفهوم للابد ، فكان محتاج لشي حل اللي يسيفط بيه لمرا لدار باها و هو يبقاو معاه لوليدات فالحفظ و الصون..
واحد الليلة كان ناشط فيها البعيوي مع سعيد الناصري رئيس مجلس عمالة كازا و رئيس فريق الوداد البيضاوي ، و هما جالسين كيشربوا” اتاي د ميريكان” عاود ليه عبد النبي على موشكيلتو و طلب منو يلقا ليه شي حل ” قانوني” ، سعيد الناصيري مع التنغيمة ديال اتاي عطاه سيناريو ديال فيلم ماطاحش على سعيد الناصيري الممثل و المخرج اللي دوز أكثر من ثلاثين عام فالتمثيل و الإخراج…قالو أنا عندي النفوذ و السلطة ، غادي نشوفوا شي واحد ندوروا معاه باش يلعب الدور ديال العشيق و نطيحوها بالجرم المشهود فخيانة زوجية ، هي تمشي لحبيسي و نتا تمشي تجيب الدراري و مريضنا ما عندو باس
قال ليه عبد النبي البعيوي و بشحال غا يتقام هاذ لبريكول، جاوبو الناصيري مبدئيا ثلاثين مليون سنتيم اللي طالب العشيق ، غا يمشي عليها بشي عام ديال الحبس واكل شارب فعكاشة حلالا طيبا و شي بركة خرى غا نعطيوها للبوليس اللي غا يتكلفوا بالقاء القبض على الزوجة المصونة فحالة تلبس و ها نتا تهنيتي من صداع الراس و التبرزيط…
الخطة لي رسمها سعيد الناصيري طبقها عبد النبي البعيوي بالنقطة و الفاصيلة ، هز مراتو من وجدة و داها للفيلا ديالو الراقية فحي كاليفورنيا فكازا ( الفيلا لي غاتكون من نصيب الناصري من بعد) و بات معاها ديك الليلة فيها ، و فالصباح بكري خرج على غير المتوقع و خلاها بوحدها فالفيلا متذرعا بأنو جاه تلفون مستعجل على شي اجتماع مهم و ضروري خصو يمشي يحضر فيه…بعد دقايق غا يرجع البعيوي و معاه العشيق المفترض و دخلو من الباب لوراني خلسة و قراه مزيان و وراه فين يمشي و شنو يدير و خرج فحالو بلا ما يدير الحس
فنفس الوقت كانت الفاركونيط دلبوليس سامرة فراس الزنقة كتسنا البعيوي يخرج باش يبدا الجزء الثاني من الخطة ديال الناصيري ، ضبط الزوجة و العشيق فحالة تلبس ..مع خرج البعيوي مع دقوا البوليس بالجهد فالباب د الفيلا و اقتاحموها، هبطات لعندهم الزوجة بلبيجاما مذعورة من لفوق و هي تلقا واحد شبه عاري مجبد فالفوتوي و البوليس حداه..و بدا العشيق قدامها كايعترف للبوليس بأنه مولف يجي لعندها وقت ما كان راجلها غايب ، هي ما فهمات حتى وزة و بقات كتغوت و تصرخ حتى لقات راسها معتقلة و مينوطا معاه و هبطوهم للحبس الاحتياطي
لحد الآن الفيلم ديال سعيد الناصيري ركب مزيان و مصروع و كل واحد أدى الدور ديالو كما هو متفق عليه و دار خدمتو و داها مجموعة لكن ، فالوقت اللي كانت فيه الزوجة كتبكي و كتغوث و تصرخ قدام البوليس ، الجار ديالها فالجهة المقابلة سمع لغواث و طل يشوف شنو واقع ، مع الطلة مع لقا السيدة جارتو مرات البعيوي كيطلعوها للسطافيت و غاديين بيها
اثاره الفضول بحال المغاربة كاملين و بغا يعرف لبلان كيفاش طرا و جرا ، فارجع لتسجيلات كاميرات المراقبة اللي عندو فالفيلا ديالو فالجهة المقابلة لفيلا البعيوي ، و هو يتصدم تفرج فالفيلم من لبدو ديالو حتى لاخرو و شاف عبد النبي البعيوي كيدخل العشيق و كايسد الباب من موراه و شاف الفاركونيت دالبوليس سامرة قانيا كاتسناه يمشي باش تقتحم الفيلا
مشا الجار خرج المقطع و حطو ف سيدي ، و بدا كيقلب على شي حد من عائلة الزوجة يعطيه ليه ، فمشا سول حارس الفيلا و هو لي قالو بأنه كيعرف خوها و عطاه نمرتو ديال التلفون…بعد ما جا خو مرات البعيوي و خدا سيدي داه للضابط اللي كان مكلف بعملية اعتقال الاخت ديالو ، الصدمة كانت قوية و الخطة كلها تهدمات و داخت الأرض بالضابط اللي سرع بربط الاتصال بالناصيري و عاود ليه على هاذ المستجد الخطير …الشي لي دفع بالناصيري حتى هو و اتصل بالبعيوي و خبرو بالكارثة
هاذ الخطأ اللي ما دارش البعيوي بحسابو …كلفوا ملاين صحاح باش يستر هاذ لفضيحة …و بفضل الجار و الكاميرات تعتقات الزوجة من الحبس و الفضيحة و تطلقات من البعيوي و احتفظات بلوليدات و تطوى الملف…لكن الجرح الغائر لي خلاه فيها البعيوي رغم المدة لي دازت ما تنساش ليها و الالم ديالو باقيا حاسا بيه ، و فاول فرصة جاتها مشات برجليها للبوليس باش تنتقم منو..
عطات ليهم كل الاسرار ديالو ، من بينها كيفاش استولى على فلوس و ممتلكات الحاج احمد بن ابراهيم ( ايسكوبارالصحراء المالي الجنسية) ، و كيفاش زور التيتر ديال الديور و الإقامات ديالو فوجدة و السعيدية بما فيها الفيلا ديال كاليفورنيا فكازا و اللي كانت النهار الاول فاسم ( المالي) لتنتقل بقدر قادر لملكية البعيوي ثم لسعيد الناصيري رئيس الوداد البيضاوي ، الذي جعل منها مكانا دافئا لقضاء الليالي الحمراء صحبة أكابر القوم من وكلاء عامون للملك و ضباط سامون بالدرك الملكي و الأمن و المخابرات و الجمارك ..لم يسلم منهم أحد من التصوير و توثيق السهرات الماجنة ربما الابتزاز عند الحاجة …و لعلي به يستحق عن جدارة و استحقاق لقب الحاج تابث تو بلوك مغاير
و خير ما اختتم به… رؤيتي لرؤوس قد أينعت و حان قطافها….و ما رجال مكتب دي.اي.آي. الأمريكي سوى أصحابها….بالمناسبة رجال مكتب محاربة المخذرات و تبييض الأموال و تمويل الإرهاب هذا ، صلاحياته تتعدى حدود الولايات المتحدة الأمريكية ، و هم الذين اعتقلوا الكولومبي ايسكوبار زعيم كارتيل ميدلين…أنعمتم اوقاتا ….سنة سعيدة مع تحيات ابو ايوب .
