ماشي لخاطري
ماشي لخاطري جيت
راه رجلي جابوني
عكازي كان شديد
عيشني في الظلمة وحداني
مكتوبي حطني
فوق الجمر الحامي
عراني و بالشوك غطاني
قهراتو ليام والسنين
حتى شفتو تهرس قدامي
عكازي ما كانش هشيش
كان منقوش
وعودو عرعار مخزاني
حتى دارت ليام عليه
وسمعت شلا كلام ومعاني
ياك أنا مشيت جنب الحيط
وعشت في مدينتي براني
ياك انا كنت نية وغير بنية
حتى وليت في جوف الليل
نتلاوح بين الحيطان
نسكر بشريب القطران
نصيح ونقول
واش عرفتو كيف دوزتو؟
مر مر علقم
علاش سكتو؟
خبيت في بئر سراري
ما نويت أيامي تغدر بيا
سكنت لبحور نغوت ونقول
واش أنا ياربي نبقى ضحية؟
شلا هموم تجمعات
حتى خدودي صفارت
وعيني دبلات
بقيت كل ليلة
نسمع عكازي يبكي وينادي
بكيت عليه وقلت
ياك أنا ضهري يبس وتهرس
نهار لبست كفن بيض
وصيتك وصية ما تخلي بيا
واليوم إييبيه اليوم
هانا نسيت
لا ماشي نسيت
راني غير تناسيت
سناء يماني
